Ямарваа нэгэн бүтээл гэдэг хүний оюун ухаанаас урган гарахдаа тухайн хүний сэтгэл зүрхний чинадад байсан гэрэл гэгээ, уй гуниг хийгээд сэтгэл хөлдөл гээд хүний эмзэгхэн хөндүүрт байж болох бүхнийг аван гардаг гэж би боддог. Иймээс ч аливаа нэгэн бүтээл хийж байгаа хүн, уран бүтээлчийг би хайрладаг, Түүнийг бас азтай гэж боддог. Учир нь сайн муу алин боловч сэтгэлийн хөдлөлөө шар айрагны мухлагт биш, шөнө дундын гудамжинд нударган зодооны дунд биш, бүтээлээрээ тайлж байгаа тэр эрхэм азтай. Иймээс л хэний ч бай эрхэм таны ч бай сэтгэл зүрхний гүнээс гарсан юм бүхэн үнэтэй. Бүтээлийг үнэлдэггүй цаг үед амьдарч байгаадаа, хүнийг хайрладаггүй нийгэмд өөрөө ч, үр хүүхдээ ч өсгөж байгаадаа гутрах юун. Нэгэн цагт Ороосын яруу найрагч Цветаева "-Бичицгээ....харагдаж байгаа бүхий л зүйлийнхээ тухай, хана туурга хаа сайгүй бичицгээ" хэмээн уулга алдан хэлсэн байдаг. Амьдрал угаасаа л ийм шаналах хэрэггүй....Энд тавьсан нийтлэлүүд хийгээд шүлгүүд минь түүгээр ч зогсохгүй өөрийн бус бусдийн хөдөлмөр шингэсэн гэрэл зургууд, уран зургуудыг ч сэтгэл зүрхнийхээ гүнээс танд зориуллаа. Таны энэ агшны сэтгэгдэлд нийцэх болтугай.
Тэр залуу алга болоосой
Тэр газрын гаваар ороод
Тэндээс гарч ирэхгүй удаасай
Тэр уруул
Тэр цээж
Тэр илбийн шидэт нүдтэй
Тэр намайг уйлуулж орхино
Тэр унах нулимс минь юм
Тийм гунигт дурсамж минь юм
Тэр амраг хонгор сүйт залуу минь юм
Тийм амтат хайр дурлал минь юм
Түүнийг зовлон гэдэг юм
Тэр залуу алга болоосой
Тэр тэнгэрийн цоорхойгоор ороод
Тэндээс бууж ирэхгүй удаасай
Тэр хоосон сэтгэл
Тэр хоосон цээж
Тэр хоосон хээтэй гуу
Түүнд таарах миний зураг гэж үгүй
Тэр залуу алга болоосой
Тэр тэнгисийн ёроолд унаад
Тэндээс хөвж ирэхгүй удаасай
Labels: Сансрын салхины шүлэгүүд