Ямарваа нэгэн бүтээл гэдэг хүний оюун ухаанаас урган гарахдаа тухайн хүний сэтгэл зүрхний чинадад байсан гэрэл гэгээ, уй гуниг хийгээд сэтгэл хөлдөл гээд хүний эмзэгхэн хөндүүрт байж болох бүхнийг аван гардаг гэж би боддог. Иймээс ч аливаа нэгэн бүтээл хийж байгаа хүн, уран бүтээлчийг би хайрладаг, Түүнийг бас азтай гэж боддог. Учир нь сайн муу алин боловч сэтгэлийн хөдлөлөө шар айрагны мухлагт биш, шөнө дундын гудамжинд нударган зодооны дунд биш, бүтээлээрээ тайлж байгаа тэр эрхэм азтай. Иймээс л хэний ч бай эрхэм таны ч бай сэтгэл зүрхний гүнээс гарсан юм бүхэн үнэтэй. Бүтээлийг үнэлдэггүй цаг үед амьдарч байгаадаа, хүнийг хайрладаггүй нийгэмд өөрөө ч, үр хүүхдээ ч өсгөж байгаадаа гутрах юун. Нэгэн цагт Ороосын яруу найрагч Цветаева "-Бичицгээ....харагдаж байгаа бүхий л зүйлийнхээ тухай, хана туурга хаа сайгүй бичицгээ" хэмээн уулга алдан хэлсэн байдаг. Амьдрал угаасаа л ийм шаналах хэрэггүй....Энд тавьсан нийтлэлүүд хийгээд шүлгүүд минь түүгээр ч зогсохгүй өөрийн бус бусдийн хөдөлмөр шингэсэн гэрэл зургууд, уран зургуудыг ч сэтгэл зүрхнийхээ гүнээс танд зориуллаа. Таны энэ агшны сэтгэгдэлд нийцэх болтугай.
Эх нутаг
Яасан их санаа вэ эх нутгаа би
Яг л ээждээ тэврүүлэх гэж байгаа хүүхэд шиг
Ямар амар амгаланг мэдрэнэ вэ эх нутгаасаа би
Таны тухай бодоход
Зүүдэн тэртээгээс үлгэрийн морь давхин ирэх шиг
Таны тухай бодоход
Зүрх булгилан цээжин дотроо бөмбөрөх шиг
Яасан их санаа вэ эх нутгаа би
Салхи нь зэргэлээнд шургасан үлгэрийн орон
Сар нь өдрөөр зүүдэлсэн домгийн нутаг
Хүв хүрэн уулс нь ижийн минь цацалыг хадгалсан
Хүлээлт, амар амгалангийн орон эх нутаг минь
Шүрэн толгойдоо атираа сийлсэн өвгөдтэйгээ хамт
Шүлэг найргийн шөнүүд нь одоо ч үргэлжилдэг үү
Арвайн гудамжинд нөгөөх л бороо асгарч байгаа юу
Арван наймтай над шиг охиныг хайрын болзоонд зогсоож байгаа юу
Танд хорогдохдоо эргэж харсан би замын дундаас
Танаас холдохдоо энэлж сурсан би амьдрал дундаас
Таныг санахдаа тэвчиж сурсан би холын газраас
Намхан намхан буурлууд нь насаа үлдээгээд одсон ч
Надад дотно бүхэн минь цагийн аясаар бүдгэрсэн ч
Найзалж явсан нөхөд минь амьдрал хөөгөөд одсон ч
Надад таныг л зорих хүсэл цээжин дотор минь дандаа байдаг
Labels: Сансрын салхины шүлэгүүд